Konsèy Prezidansyèl Tranzisyon an (KPT) lanse jounen madi 14 janvye 2025 lan « MADI NASYON AN ». Yon inisyativ KPT a ak Gouvènman an pran nan lide pou ranfòse kominikasyon ant Leta ak popilasyon an. Chak madi, otorite yo ap adrese yo ak pèp la pou enfòme tout moun sou pwojè Leta ap reyalize yo.
Prezidan KPT a mete aksan sou vizit Prezidan kolonbyen an Gustavo Petro ap gen pou reyalize nan vil Jacmel jounen 22 janvye k ap vini la a. Vizit sila a ap ranfòse kowoperasyon nan mitan 2 peyi yo. Nan sans sa a, reprezantan 2 nasyon yo ap òganize yon Konsèy minis binasyonal nan vil Jacmel epi reyalize plizyè lòt aktivite an favè popilasyon an.
Ekselans Voltaire tou pwofite anonse inogirasyon pò Sen Lwi di Sid la pou vandredi 17 janvye 2025 lan. Li fè konnen tou Konsèy la ap kontinye batay pou fè pèp la rale yon souf sitou nan kesyon sekirite a.
