Samedi 28 Desanm 2024 la, sou direksyon premye minis lan, Minis komès ak endistri a, Mesye James Monazard, yon pwotokòl akò siyen ak Rasanbleman Madan Sara (RAMSA). Inisyativ sa a fè pati efò Gouvènman an pou kontinye pou sipòte aktè ki pi vilnerab yo nan ekonomi nasyonal la, nan yon kontèks ki make ak anpil defi sosyo-ekonomik.
Seremoni an, ki te òganize nan lokal RAMSA a, se te yon opòtinite pou echanj rich ant pati ki gen enterè yo. Reprezantan Madan Sara a te pataje temwayaj li, li te ekspoze reyalite ak defi lavi chak jou yo. Rekòmandasyon sa yo pral jwenn Premye Minis lan, Alix Didier Fils-Aimé, nan lide pou reponn konkrètman a nesesite yo.
Madan Jocelyne Jean Louis, Kòdonatris RAMSA, ouvè seremoni an ak yon minit silans nan memwa viktim ensekirite yo. Li kalifye etap istorik sa a, kòm premye angajman Leta a an favè Madan Sara yo.
Nan diskou li , Minis Monazard reyafime wòl fondamantal Madan Sara nan ekonomik peyi a. Li anonse yon premye sibvansyon « uit milyon goud » pral bay ak RAMSA apati mwa janvye 2025 lan, yon kanpay fòmalizasyon pral lanse. Inisyativ sa a vize akòde rekonesans ofisyèl ak Madan Sara ki pral ba yo aksè a kredi ak lòt opòtinite ekonomik.
Akò sa a fè pati yon seri mezi estratejik Gouvènman an adopte, anba direksyon Premye Minis Alix Didier Fils-Aimé ak Konsèy Prezidansyèl Tranzisyon an ki dirije pa Leslie Voltaire, pou relanse ekonomi nasyonal la. Sipò pou mikwo, piti ak mwayen antrepriz (MPME), ansanm ak sipò pou Madan Sara, reflete yon dezi fèm pou rekonstwi yon ekonomi ki enklizif, ki rezistan epi ki ka pote espwa pou tout sitwayen.
