Ajan Direksyon Santral Polis Jidisyè a (DCPJ) arete, jodi Dimanch 12 Janvye 2025 lan, ansyen depite Tirivyè Latibonit lan, prophane Victor. Se Komisyonè Divizyon Michel-Ange Louis Jeune, pòtpawòl DCPJ a, ki konfime arestasyon an.
Operasyon sa a fèt nan rezidans prive li nan Petyonvil, nan menm jou kote peyi a te komemore tranblemanntè trajik 12 janvye 2010 a. Apre arestasyon li, yo fouye lakay ansyen palmantè a, ki chita nan Vivy Mitchell.
Si pou kounya a poko gen vrè motif arestasyon an, ansyen depite a te figire nan lis politisyen ke Etazini ak Kanada te sanksyone. Yo akize l kòmkwa li ta finanse gang ame ki enplike nan vag vyolans k ap souke peyi a depi plizyè mwa.
Ankèt la ap kontinye, e otorite yo poko bay plis detay sou akizasyon yo kont ansyen ofisyèl la.
