Inter Miami CF kontinye ranfòse ekip li a, li akeyi atakan ayisyen Fafa Picault. Anons sa a, ki te fèt ofisyèl madi sa a, make yon etap enpòtan nan karyè Grenadye a, ki pral kounye a jwe ansanm ak zetwal mondyal tankou Lionel Messi, Luis Suarez, Sergio Busquets ak Jordi Alba.
Nan nòt pou laprès li a, klib Florid la fè lwanj pou pèfòmans ak talan Picault, pandan li eksprime antouzyas li pou kontribisyon li pou sezon 2025 la.
“Mwen onore anpil pou m rantre nan yon klèb anbisye tankou Inter Miami CF. Mwen paka tann pou m rankontre koekipye mwen yo ak travay ansanm pou yon kanpay istorik pou 2025 lan. Opòtinite sa a vrèman espesyal e mwen pa ka tann pou m fè listwa ak ekip sa a,” se deklarasyon jwè a pandan diskou li.
Fafa Picault, 33 lane, te gen yon sezon remakab ak Vancouver Whitecaps an 2024. Li te make 10 gòl ak bay uit pas desizif nan tout konpetisyon an, li te jwe yon wòl kle nan chanpyona Kanadyen an, ak kalifikasyon yo pou faz eliminatwa MLS Cup la.
Adaptasyon ofansif li ak eksperyans li pral bay Inter Miami yon gwo avantaj, ki vize objektif anbisye pou pwochen sezon an. Picault pral rantre nan yon atak deja tèrib epi ede ranfòse imaj yon klib ki atire pi bon talan nan foutbòl mondyal la.
